Méziek en Baeker vasteloavend zin altied mitein verbônge gewaes. Gein good fjès zônger meziek.

In ut verleje woorte auw vasteloavesleedjes gesjpeelt door einige bloazers, voornamelijk gesjoald bie de keuninklikke hermenie. Tiejes de vasteloavesoptochten van veur d’n oorlog zoate dees bloazers op eine wage en sjpeelde veural Duitsje vasteloavesmeziek. Noa eine optoch koam ut waal uns veur dat ein aantal bloazers zich same pakde en de sjtûmming in de Baekse kafees van ein muzikale nwoàt veurzoag.

Naeve de hermenie woar d’r in Baek nog ein meziekvereniging, nl. ‘Het Beeker Symphonie Orkest’. Dit orkes sjpeelde vooral hoagsjtoande klassieke méziek. Leeje vormde duo’s en trio’s. Zie sjpeelde, naeve de Duitsje vasteloavesmeziek, auch Baekse sjlagers mit vasteloavend in de Baekse kafees. Ut zin dees bloazers woo veer aan te danke höbbe dat de Baekse sjlagers van veur d’n oorlog noch waere gesjpeeld.

Noa d’n oorlog is de meziek rond vasteloavend mjè georganiseerd. D’r woord dan auch ein orkes opgerich besjtoande oet leeje van de keuninklikke hermenie St. Caecilea en ut BSO. Zie neumde zich ‘Baeker Hofkapel’. Dit orkes sjtông aan ut begin ônger leiding van Sef Pijpers, geine onbekende in de Limburgse meziekwaereld. De Hofkapel trooj voor ut ièsj in de sjienwerpers op 11 november 1947. Ièsj woort in de Hermeniezaal (noe ‘de Heeren van Beeck’) gebloaze, om daonoa d’n oavend muzikaal veurt te zette in ut ‘Parkhotel’.

De Baeker Pottentaote hôbbe al die joare kenne raekene op de muzikale invulling van hun vasteloavesaktiviteiten door de Baeker Hofkapel, ein van de oudste vasteloavesskepèlle in Limburg. Noe besjtaet de Hofkapel oet leeje van de Keuninklikke Hermenie St. Caecilea en Drumfanfare en Majorettenkorps Irene-Lucia. Auch einzelgengers die neet bie ein van dees 2 vereiniginge zitte, zin lid van de Hofkapel.

Ut 5x11-jarig jubileum höbbe ze zoaterdig 12 jannewari 2002 gehauwte. Tjwiè daag eeder haeje de Baeker Pottentaote hun al ein grwoàt kadoo gegaeve door ès opvolger van Guy Smeets, Eric Voncken ès Prins Eric I oet te roope om in ut vastelaovessezoen 2002-2003 euver ut Pottentaoteriek te regere. ‘Auwt Baek’ woar te klein om de jônges en maedjes van de Hofkapel in hun auwe kostuum ein hèndje te gaeve.

Jean-Pierre Klinkers woort door ut SLV ongersjeije mit de Zilveren Buut waeges zien 11-jaorig lidmaatsjap van de Baeker Hofkapel. Opgetroaje woort dae oavend door ein Zaate Hermenie oet Bookend bie Venlo (einige joare trûk Nederlands Kampioen Zaate Hermeniekes en good veur eine sjtûnt, die zelfs de kezèt haet gehoald), Déja Vu (eine zanggroep van 3 sjoàn Limburgse maedjes, die covers zinge in ût Limburgs) en Gaston Jacobs (dae altied veur sjtûmming zôrrig). Muzikaal woord d’n oavend aanein gebreit door DJ Marco. Hae wis mit de juste vasteloavesmeziek eederein op de vloer te kriege. De jônges en maedjes van de Hofkapel höbbe in eeder geval eine te gekke oavend gehad en höbbe deeze oavend genög enersjie opgedoan om zich de komende joare de longe oet ut lief te bloaze veur de Baeker vasteloavend.

Dit veur de Hofkapel jubileumjoar is de Baeker Pottentaote zwoa good bevalle dat in 2003 Robert Vrancken van de BHK woort oetgeroope es Prins Robert I.